पोलीस दलातील शिपाई पदांच्या १० हजार जागा भरण्याचा सरकारचा निर्णय

राज्यातील कायदा-सुव्यवस्था भक्कम करण्याबरोबरच पोलीस दलावरील कामाचा ताण कमी करण्यासाठी राज्यातील विविध पोलीस दलातील शिपाई संवर्गातील पदांच्या १०,००० जागा भरण्याचा निर्णय घेण्यात आला असून सदरील भरती येत्या वर्षभरात पूर्ण करण्यासाठी सर्वंकष प्रस्ताव पुढील मंत्रिमंडळ बैठकीत मांडण्याचे निर्देश दिले असल्याची माहिती राज्याचे उपमुख्यमंत्री अजित पवार यांनी दिली आहे.

गृह विभागाकडून पोलीस शिपाई पदांच्या आठ हजार जागा भरण्याचा प्रस्ताव मांडण्यात आला होता परंतु मा.अजित पवार यांनी त्यात आणखी दोन हजार जागा वाढवून दहा हजार पदांची भरती करण्याचे निर्देश प्रशासनाला दिले असून नागपूर जिल्ह्यातील काटोल येथे राज्य राखीव पोलीस दलाच्या महिला बटालियनची स्थापना करून त्यासाठी १३८४ पदे निर्माण करून टप्प्या-टप्प्याने भरण्याचा निर्णय घेण्यात आला आहे.

उपमुख्यमंत्री अजित पवार यांच्या अध्यक्षतेखाली मंत्रालयातील त्यांच्या दालनात मंगळवारी झालेल्या महत्वाच्या बैठकीला गृहमंत्री अनिल देशमुख, गृह विभागाचे अतिरिक्त मुख्य सचिव सीताराम कुंटे, वित्त विभागाचे अतिरिक्त मुख्य सचिव मनोज सौनिक, गृह विभागाचे विशेष प्रधान सचिव अमिताभ गुप्ता, महसुल विभागाचे अतिरिक्त मुख्य सचिव नितीन करीर, पोलीस महासंचालक सुबोध जयस्वाल, माहिती व तंत्रज्ञान विभागाचे प्रधान सचिव एस. श्रीनिवास, राज्य राखीव दलाच्या अप्पर पोलीस महासंचालक अर्चना त्यागी आदी वरिष्ठ अधिकारी उपस्थित होते.

 

संबंधित बातमी पाहा

 

आपल्या मित्रांना शेअर करायला विसरू नका !!!